Berriki UPV/EHUk Bioinformatics and Omics Nazioarteko
Berezko Master berria onartu du. Graduondokoa Biozientzietan tituludunei
zuzenduta dago eta helburua ikertzaile eta profesionalak hezi eta trebatzea da,
sekuentziazio teknologia berriek planteaturiko erronka berriei aurre egin eta
konponbidea emateko. Masterra 2016/2017 ikasturtean emango da ingelesez eta
aurretiko izen-ematea zabalik egongo da abuztuaren 20a arte.
Bioinformatika, hain zuzen ere, teknologia konputazionalak
datu biologikoak kudeatzeko eta aztertzeko baliatzean datza, eta tresna
matematikoak erabiltzen dira sortutako datuetatik informazio baliagarria
eskuratzeko; genomaren sekuentziazioa, esaterako. Bioinformatika, beraz, oso
garrantzitsua da; izan ere, genomaren informazioa antolatzea eta aztertzea lan
oso nekeza da, eta ingeniaritza eta garapen zientifikoak behar dira. Gainera,
bioinformatika oso erakargarria da ikertzaile gazteenentzat, biologia ulertzeko
beste modu bat ematen baitie.
UPV/EHUko Zientzia eta Teknologia Fakultateko Genomic
Resources ikerketa taldeak antolatu du masterra eta Biologia, Estatistika eta
Informatika arloen arteko bidegurutzean suertatu den profesionalen eskaerari
erantzuten dio. Bioinformatics and Omics-ek ikasleek datu genomiko kopuru
handia aztertu eta emaitzak interpretatzeko beharrezko ezagutzak informatikoak
eskuratzea nahi du. Ikasturtea amaitzean, ikasleak kapaz izango dira garrantzi
biologikoko ondorioak ateratzeko, biomedikuntza, bioteknologia edo
bioaniztasuna bezalako diziplinetan aplikatu ahal izango direnak.
Lehen lauhilekoa (30 ECTS) Bordeaux-eko unibertsitatean
emango da. Bertan, ikasleek bioinformatikako oinarrizko gaitasunak eskuratuko
dituzte. Bigarren lauhilekoa, aldiz, UPV/EHUn emango da, eta beste 30 ECTS
izango ditu (irakaskuntzako 10 ECTS eta Master Amaierako Laneko beste 20).
Bigarren zati honetan Bioinformatikako ezagutzak hainbat diziplina omikoetan
aplikatuko dira (Metagenomika, Transkriptomika, populazioen Genomika,
Filogenesiak, Sistemen Analisiak, etab.).
UPV/EHUko Berezko Masterreko ikasleek aukera izango dute
Bioinformatikako espezializazioa jarraitzeko Bordeaux-eko unibertsitateko
Bioinformatique Master Ofizialeko bigarren ikasturteko 60 ECTS-etan
matrikulatuz gero. Era horretan, Bordeaux-eko Nazioarteko Master Ofizialeko
titulua ere eskuratuko lukete.
Informazio gehiago, hemen.